南屯區 大墩國小 江孟聰 2018-11-01 報導

「紅柿若出頭,墩小的志工歡喜甲掠未牢」

紅柿的汁嘛會當染布咧

大墩國小佇10月30日禮拜二,拄好學生囡仔期中考的時陣,選擇這工安排教育志工出外去學習一寡智識,聽講這馬紅柿大出,好,按呢就來去新竹縣的新埔鎮囉!
大墩國小的教育志工真正毋是蓋的,萬項代誌無啥需要老師來煩惱,活動家己規劃,活動組長莉馨無法度來,但是盡心的伊,透早猶是佇遊覽車頂點名,聽候每一位愛爸愛媽攏來的時,伊祝福逐家會當學著物件了後,隨閣去無閒,真正感心啊!
起車了後,佇車頂無安排唱歌,活動組淑如媽媽蹛來一片非常勵志的影片─予逐家欣賞。寢頭情節較慢無啥吸引人,劇情卻是慢慢仔進入高潮……當好看的時,講地點到矣啦,實在是吊人的胃口!
今仔日參訪的地點是,所在的舊地名叫做旱坑,看地名就知影,是按怎會發展柿餅囉!農場後山有三公頃偌,種有二百偌欉的柿樹,滿山黃錦錦的柿仔,干焦看就一直流喙瀾。
講解由號稱該農場二姊來進行,說明柿餅的由來、品種的好䆀、分辨來源出產地和柿仔的用途等等,這嘛是這擺參訪的重點。柿子的汁嘛會當提來做染料,頭家攢步皮包仔,教逐家用刷的,了後閣用定色劑來定色,圖案攏割好仔,阮只要提筆一直鑢就好。頭家講:「先染柿汁……。」顧開講的無注意聽,閣問講:「先染頭殼會使無?」逐家是笑甲強欲吭跤翹。最後逐家去看曝柿餅閣佇正身護龍的三合院古厝翕相留念後,逐家的腹肚嘛開始咕嚕咕嚕叫。本底是15分鐘的車程煞因為是產業道路,遊覽車必須翻頭踅遠路。
中晝頓來到九芎湖陳家休閒農場,客人仔菜確實好食,飯後閣有麻糬、擂茶(時間袂付,用沖的),這時老闆提一寡仔竹仔,問講這桌啥上辣,逐家聽耽去指我,一時我解說講,頭家是問啥上辣,咱蔡佳燕會長自動講,若是講辣,彼就是我!老闆自按呢特別做一枝有鳥仔的phín仔送伊,坐佇會長邊仔的輔導會長黃淑媛嘛咧張講,啊伊有我若無,頭家嘛誠率直閣兼毒喙滾耍笑講,你這馬也無閣捐錢啊,免啦!人將惹熊惹虎毋通惹著刺查○,頭家加做一枝有翼的phín仔予伊。兩位美女會長講這是家庭婚姻翁某感情美滿的物件,看起來,這逝參訪有影是「有食閣有掠柳!」